Onte os nosos equipos desprazáronse ata Chapela para remar a que foi a última proba amistosa antes do comezo das ligas (ACT, LGT-A e LFem). A nosa embarcación Feminina foi a primeira en sair, seguida do equipo LGT-A, sendo a tripulación ACT a última en sair das 28 traiñeiras participantes.
Na categoría feminina a nosa embarcación rematou en terceira posición por detrás das anfitrionas de Chapela. Pola banda masculina, a nosa tripulación LGT-A rematou en 8 posición mentres que a nosa embarcación ACT rematou segunda, detrás dos seus compañeiros de liga de Ares, que fixo un gran papel na regata.
COMEZO DE LIGA
A vindeira semana dará comezo a Liga Galega A tendo a vila de Muros como escenario. As ligas ACT e Feminina terán que esperar unha semana máis para comezar a competición. A EuskoLabel Liga farao o sábado 3 de xullo na Coruña e a Feminina o domingo 4 na Pobra, coincidindo coa segunda xornada da LGT-A.